Hlaupahópurinn samanstendur af fjölskyldu, vinum og velunnurum Guðrúnar Birnu sem greindist með beinkrabbamein í febrúar sl. í upphandlegg og meinvörp í lungum. Hún hefur gengist undir lyfjameðferð og aðgerðir til að uppræta meinið þar sem m.a. var fjarlægður stærstur hluti upphandleggsbeins og sperrileggur úr fæti græddur í staðinn auk þess sem meinvörpin í lungunum voru fjarlægð. Mögnuð teymi heilbrigðisstarfsfólks hafa komið að meðferðum, aðgerðum og umönnun Guðrúnar Birnu, sem að mestu leyti fer fram á Barnaspítala Hringsins.

Guðrún Birna er 13 ára, stundar nám í Smáraskóla og spilar körfubolta með Breiðablik. Hún er lífsglöð, ákveðin og klár stelpa og hefur tekist á við veikindin af miklum dugnaði, jákvæðni og æðruleysi – hún er hetjan okkar <3 Markmið hennar er að vera laus við meinið í lok ársins.

Aðgerðirnar tókust mjög vel en Guðrún Birna á eftir þó nokkurn spöl í mark. Við viljum styðja Guðrúnu Birnu alla leið og jafnframt styrkja Styrktarfélag krabbameinssjúkra barna sem veitir börnum sem glíma við krabbamein og fjölskyldum þeirra ómetanlegan stuðning. 

Nafn hópsins er jafnframt til heiðurs sperrileggnum sem er magnaður varahlutur líkamans og varð til þess að Guðrún Birna heldur hendinni að tilstuðlan frábærs teymis heilbrigðisstarfsfólks á LSH og frá Salgrenska sjúkrahúsinu. Sperrileggur merkir reyndar líka montinn maður en það er í góðu lagi því við erum mjög montin/stolt/hreykin af því hvað Guðrún Birna er ótrúlega seig og dugleg. Áfram Guðrún Birna - alla leið!