Bjarni Þór Einarsson heiti ég og er 39 ára gamall.

Ég glími við heilalömun CP (e. Cerebral Palsy) sem orsakar hreyfihömlun og skerðingu. Ég er spastískur.

CP er heilalömun sem hefur í för með sér mismikla hreyfiskerðingu.

Heilalömunin getur komið til vegna blæðinga, smárra blóðtappa, súrefnisskorts eða sýkingar. Heilaskaðinn verður yfirleitt á fósturstigi, við fæðingu eða hjá nýburum.

Við fæðingu varð ég fyrir súrefnisskorti og hef þar af leiðandi glímt við hreyfihömlun í hægri hendi og báðum fótleggjum og málhömlun.

Fyrir nokkrum árum byrjaði ég að fara reglulega í gönguferðir, en í þeim nota ég göngugrind. Ganga hefur reynst mér erfið hreyfing og þess vegna langar mig að fjárfesta í sérútbúnu hjóli.

Upplifun af því að geta hreyft mig meira og styrkt líkama minn eftir bestu getu veitir mér hvatningu, ánægju og gleði.

Frá barnæsku hef ég stundað markvissa þjálfun og hreyfingu. Ég æfði og keppti í sundi heima og erlendis til 23 ára aldurs. Síðustu ár hef ég síðan með þjálfurum lagt kapp á lyftingar og æfingar í róðravél. Í dag er ég í einkaþjálfun hjá Sólveigu Svövu, sem hefur verið mér ómetanleg í alla staði. Sólveig hefur haldið mér við efnið. Hvatt mig og styrkt og þannig komið í veg fyrir að hreyfihömlun mín aukist og hreyfigeta skerðist.

Styrktaræfingar og almenn hreyfing kemur í veg fyrir að hreyfigeta mín skerðist vegna vöðvarýrnunar, sem fylgir því að vera spastískur og endi með því að vera fastur í hjólastól og eða rúmliggjandi.

Ég hef alltaf haft mikið keppnisskap. Eftir að ég byrjaði í einkaþjálfun hefur það verið markmið mitt að lyfta aukinni þyngd og að bæta tíma minn í róðravélinni. Markmið mitt er að komast í betra líkamlegt form. Ég set stöðuga pressu á mig fer út fyrir þægindaramma minn með því að toppa sjálfan mig í daglegu lífi.

Markmiðið er að komast inn á stórmót erlendis og stærsta markmiðið mitt er að keppa í hjólreiðum á Ólympíuleikum fatlaðra.

https://www.facebook.com/bjarnie3/