Í desember 2023 missti ég heilsuna, heyrnina, orkuna  og stundum fótana þegar svimaköstin felldu mig. Ég lá löngum stundum í horninu í sófanum á öðru eyranu til að bægja burt riðunni. En ég einsetti mér líka að ná betri heilsu og læra hvernig ég eigi að lifa með króníska sjúkdómnum mínum Meniéres. Lykilinn að bættri heilsu var að finna í auknu jafnvægi - sama hvort það snerti mataræði, vinnu, svefn eða allt hitt. Svo nú hleyp ég hæfilega lengd á mátulegum hraða til styrkar heyrnahjálpar. 

Margir myndu frekar velja að vera blindir en heyrnaskertir, en átta sig þá oft ekki á þeirri félagslegu einangrun sem felst í heyrnarskerðingu. Þau eru óteljandi skiptin sem ég hef þurft að giska í eyðurnar, mæta pirringi þegar ég bið fólk að endurtaka eða gefist upp, hlegið og kinkað kolli í von um að það passi inn í samræðurnar. Svo ég tali ekki um öll þau vandamál sem fylgja því að missa jafnvægi vegna eyrna vandamála. 

Samtök sem gera ósýnileg málefni eins og heyrnaskerðingu sýnileg eru mikilvæg ❤️